Computern uff hessisch
Kabiddel 1 - Saft druff:
Am Kasde unnerm Scherm de reschde Knobb neidrigge bisser eirast. Uffbasse:
Es huubt.
Huubts ne: Gibts net, noch net bassiert. (Knobb muss!!! drinbleiwe)
Des Bernsche - wo links never dem Knobb wo mer neidrigge muss leit,
manschmol is es ach unnedrunner, iss die Bern wo brenne muss, damit mer waas,
dass des Ding Saft hot.
(Wann die Bern net brennt, hot des Ding kaan Saft).
Dann: Net lang maule, erst gugge ob die, die hinne aus dem Ding wo der Knobb
droo iss, den mer neidrigge muss, in dere Dohs drinsteggt, di mit dem
Iwwerlandwerg zusammehengt.
Iss die Schnur droo, dann anner ruffe, der die Bern zum brenne bringt.
Kabiddel 2 - Umschald-Knobb drigge:
Der Knobb - der wo uff dem annern Ding, wo all die annern Knebb aach druff
sinn - der wo zwaa Pfeilscher oww druff hat unn wo die grie Bern unnedrunner
iss, runnerdrigge.
(Nur aamohl!)
Brennt die grien Bern, isses gut! Brennt se net, aach.
Kabiddel 3 - Oomelde:
Eigewwe von dene Knebb - die wo uff dem annern Ding druff sinn, do wo aach
der Knobb mit dene zwaa Pfeilscher unn dere grie Bern druff iss - die Knebb
drigge, die mer drigge muss, wemmer sisch oomelde will. Des haasd: Mer muss
die Knebb drigge, wie mer haasd. Driggt mer die falsche Knebb, haasd mer net
so. Des haasd: Mer muss unbedingt die rischdische Knebb drigge.
Kabiddel 4 - Oogemeld:
Wemmer drin sinn, SCHAFFE !!!
Kabiddel 5 - Abschalde:
Uff de Scherm gugge, awwer konsegwent unn wadde bisses gracht odder die Uhr
schdehd.
Dann: Zusammepagge unn nix wie haam.
